• De Döschkassen - Boyens Medien

    Slitzohrn un greune Knööp

    Ennli mokt sick mol een stark för de unminschlichen Bedingung‘ in de Textil-Industie. Dat wurr würkli heuchste Tied. Unsen Entwicklungsminister Gerd Müller hett an Mondag so’n greun‘ Knoop as Qualitätsteeken vörstellt.
    Wat scheun. 26 Kriterien mööt de Ünnernehm, de Tüch verköfft, nu inholn. Süss-un-twindig! Jungedi.
    Un de Ünnernehm‘ de den Knoop hebben wüllt, wiest dormit, dat se sick „friewilli sülms verplicht“, sick an de Regeln to holn. Na, denn man to.
    Blangbi: Wenn de Boomwull för dat Tüch vun Kinner in arme Länner plöckt ward, de dorför keen Geld, sünnern blots ’n poor an de Ohrn kriegt, is dat wiederhen in Ordnung. Dat heuert ni to de Regeln. Erst in de Tüchfabrik tellt dat. Hmm. Dulle Idee. So dull, dat sogor veele Tüchhökers dat för dumm‘ Tüch hölt.
    Ick wurr dat veel beter finnen, wenn man jedeneen, de Minister bi uns ward, so’n greun Knoop an’t Ohr neiht. Rechs oder links, annerlei, dor, wo se dat lieden möögt. Vun mi ut mööt de Knööp ook ni all gröön ween. De Farv kann sick jeder utsööken, as’e lusti is. Hell- oder düsterraud, geel, swatt, kunterbunt oder bruun, wenn’t ween mutt.
    So. un düsse Knoop in’t Ohr is denn dat Teeken dorför, dat de Ministerin oder de Minister, de em dreegt, sick ni smeern oder besteeken lött. Deiht he oder se dat doch, denn ward de Knoop eenfach utreeten un man kann al vun wieden sehn: Dat is ’n Slitzohr, dor lot leever de Fingers vun – so as fröher mit de Ohrring‘ bi Handwarkers op de Walz. Jo. Un de ganzen utgereetenen Knööp kümmt denn in so’n Inweckglass, dat Bunnesdagpräsident Wolfgang Schäuble in Reichsdag op’n Tresen stellt ward. Dor steiht dat good un praktisch, denn so kann Wolfgang sien eegen‘ Knoop dor ook fuurts rinsmieten, no dat he sick em utreeten hett.
    Na jo, so’n lütten Hoken is dor overs bi. Noher will bi uns överhaupt keen mehr Minister warrn. Op de anner Sied wurrn ehr denn overs ook ni mehr so’n Grappen in Kopp komen, de veel Geld kost‘ un nix bringt.
    Oha, dat is’n klassische Zwickmöhl.
    Overs ’n Versöch weer dat wert…

    In düssen Sinn

    Wer hett dat Sorgerecht?

    Junghedi, wat dor in England afgeiht, dor kannst Di hannen
    un Fööt an warmen. As an 29. Mai 2017 besloten wurr, dat dat mit den Uttritt
    vun England ut de EU an 29. Mai 2019 losgohn schull, dor weer doch irgendwie al
    klor, dat an 29. Mai 2019 överhaupt nix passeert.

     

    Denn gung dat hen un her un op’t Letzt‘ wurr de 31.
    Oktober as Termin för den Berexit ansett – geregelt oder ungeregelt, ganz egol.

     

    Intwüschen weer de drullige Boris Johnson je al
    Premjeminister, de je – wenn man sick sien Hoor ankiekt – so’n lütt beten
    utsüht, as weer he de uneheliche Broder vun Donald Trump. Annerlei.

     

    Johnson wull nu also glieks erstmol sien Muskeln speeln
    loten, de vun buten gor ni to sehn sünd un den ungeregelten Brexit Enn Oktober
    dördrücken. Un dat mit jeden smeerigen Trick, de em infull.

     

    Un ick Döspaddel heff al weller keen Wett afsloten, denn
    ook dat an 31. Oktober gor nix passeern ward, harr ick al in’t Geföhl.

     

    Na jo, lusti is dat la lang ni mehr, besünners för all de
    ganz normolen Lüüd vun de Stroot ni. 66 Millioon Inwohners vun’t Vereente
    Königriek, hebbt al an 23. Juni 2016 över den Brexit afstimmt. Vör över dree
    Johr!

     

    Un siet düsse Wohl, kümmert sick een Regeerung no de
    annere blots noch üm düssed Thema. Vun wegen, „dat Volk hett wählt un so ward
    dat mokt“. Dor keem gor nix no.

     

    In Wohrheit behannelt de britische Regeerung ehr Volk siet
    de Wohl as’n Driff lütte, dumme Kinner.

     

    Overs wat is, wenn Boris Johnson un veellicht noch ’n poor
    annere nu ganz un gor afdreiht? Wat ward denn mit all de Briten? Üm de armen
    Lüüd mutt sick doch een kümmern.

     

    Wo is dat överhaupt in dat Scheedungsdrama mang de EU un
    Groot Britannien? Is dor de Sorgerechtsfroog al mol besnackt worrn? Pass man
    op: Noher ward dat so, dat de Briten een Week bi Oma Lisbeth, also bi de
    Königin un een Week bi Tante Uschi vun de Leyen, de näste EU-Kommissioonspräsidentin,
    wohn‘ mööt. Dat ward ’n gewusel. Ick bliev jedenfalls wiederhen gespannt dorop,
    wo sick dat allns noch entwickelt…

     

    In düssen Sinn

    Saubere Sook

    Na – wat kümmt nu denn al weller? Güstern heff ick leest, dat jüst de Auto-Firma, mit de de Diesel-Schandol vör veer Johr losgohn is – Nooms will ick hier ni schrieven – nu weller ’n Diesel op’n Mart bringt.
    Un dat Auto schall nu ohn‘ Schummel-Softwäär dorbin so weni Stickoxide achter rutpusten, dat man dat meist gor ni mehr meten kann – weniger jedenfalls as de mehrsten Benziners.
    Jungedi, dat is di wat.
    Wo dat geiht? Ganz eenfach, de Autos ward blang Diesel noch mit Harnstoff optankt, man kunn ook Addel dorto seggen. 
    Dat man de Addel nu overs frisch ut’n Kohstall in Tank schüffeln oder dor ook mol sülms rinmiegen kann, dat glööv ick weniger. Den Krom mutt man scheun extra kööpen.
    Wat heet dat nu overs för uns? Mööt wi nu de Benziners weller wechsmieten, de wi uns holt hebbt, no dat wi jüst erst de Diesels wechsmeeten hebbt?
    Elektro-Autos kann man je jümmers noch ni so recht betohln, un de Herstellers tüftelt je leever an niede Diesels, as dat se wieder versöcht Strom-Autos to buun, de man ook in Alldag bruuken un de sick Otto-Normol-Verbruuker ook leisten kunn.
    Ick seh dat al komen: Wi kriegt bald vertellt, dat wi uns gröttere Garoschen buun schüllt, un dor kümmt denn een E-Auto, een Benziner, een vun de nieden Diesels un ’n Fohrrad rin.
    Un denn wurr man jeden Morn in de Norichen vertellt kriegen, mit wat för’n Fohrtüüch man jüst losschall. An leevsten je mit Rad, overs wenn man in Ketelsbüttel wohnt un in Hamborg arbeidt un sien Chef denn seggt, dat man so bummeli gegen Meddag op de Arbeid is, Klock een overs al weller losmutt, dormit man rechttiedig to’n Obendbrot to Huus is, denn kann man ook glieks no’t Arbeidsamt afbeugen.
    Ganz ohn‘ Autos ward dat also ni gohn, wenn de Wirtschop so as nu wiederloopen schall. 
    Man schull mol ’n Auto erfinnen, dat mit Dummheit löppt. Dat weer ’n  saubere Sook. Denn an Enn sünd wi je doch weller de Dummen un dormit harrn wi den Tank jümmers vull…
    In düssen Sinn

    Beschüüert op Hochdüütsch

    Liekers wi in swore Tieden levt, wat de Besettung vun Lehrplätze mit Uttobillende angeiht, freut man sick je doch, wenn man ’n goode Arbeiststeed kriegt, bi de man veellicht sogor good verdeent.
    Nu is dat overs so, dat man ook arbeiden mutt, wenn man so’n Steed afkreegen hett – dat heet: twüschendör mutt man wiesen, dat man sien Geld wert is.
    Dor sitt in Oogenblick je ook Andreas Scheuer mit to, de unsen Verkehraminister is. Un de hett sick wiss freut, as he no Huus keem un seggen kunn, wat he nu Verkehrsminister weer.
    Un wat för’n Minister dat is. Dull is dat. Man mutt sick jümmers anschnall’n wenn de losleggt.
    Nu hett he je weller so scheune Idee’n op’n Mart smeeten, üm to wiesen, wat he noch dor is.
    Düsse lütten Elektorullers „E-Scooters“ seggt man je dorto, de al veel Stoff opwirbelt hebbt, will he nu je op Busspoorn fohrn loten – also in de Stadt. Bi uns hebbt wi je keen Busspoorn. Un ni blots de will he dor fohrn loten. Ook Pkw schüllt dor fohrn, overs blots, wenn mehr as dree Lüüd in’t Auto sitten doht.
    As he trech weer mit düsse dull’n Ideen, hett he sick wohrschienli erstmol ’n Buddel Beer opmokt. So swor hett he al lang ni mehr arbeid‘.
    Anschien’d is he overs ook al lang keen Bus mehr fohrt.
    Denn in Bus stiegt je an un för sick blots Lüüd in, de bilütten ook dor ankomen wüllt, wo se henfohrt.
    Wenn de nu overs in Busse sitten dehn, de fief Elektro-Rullers un 20 Autos mit tosomreekend süssti Lüüd dorbin achteran sliekert, denn kunn‘ se ook to Foot loopen.
    Dor keem man sick regelrecht „bescheuert“ vör, as man op Hochdüütsch seggt. Dat Woord hett je meist ’n niede Bedüüdung kreegen. Un Andreas hett ook al markt, wat dat ni sien beste Idee weer. Dorüm freut he sick nu ook düchti, dat de SPD nu so veel dör de Norichten geistert un de Soli, de mol afschafft warrn schall un mol ni oder blots ’n beten. Overs töövt man af – sien näste groote Idee Scheuer al lang in de Schuuv. Ick bün nu al ganz gespannt dorop, wat vun den noch allns kümmt…
    In düssen Sinn

    Dösig Övern Dag

    Mi is jüst mol weller wat opfulln. För allns gifft dat bi uns Regeln – blots för den Dag ni so richti. Dat passt gor ni to Düütschland. In England to’n Bispeel is dat so: Vun den Oogenblick, an den dat hell ward bet Klock twölf is dat „Morning“, also Morn. De Meddagstied vun twölf bet een is „Noon“, denn kümmt de Nomeddag, de „Afternoon“ heet, un wenn dat düster is, is „Night“ also Nacht. Un twor so lang, bet dat hell ward, denn is weller „Morning“.
    Bi uns is dat ganz anners. Morn is dat bi uns so bummeli af Klock süss in de Fröh, kümmt so’n beten dorop an, wann man opsteiht. Hier geiht de Morn overs ni bet to’n Meddag. Twüschendör kümmt nömli noch de Vörmeddag, de fangt bi den een Klock negen, bi den annern Klock teihn oder noch loter an. Denn is Klock twölf Meddag, dat is blang Middernacht un de Geisterstünn, de eenzige Tied de würkli fastleggt is. Direkt no’n Meddag kümmt dat Wichtigste: De Meddagstünn. De kann gor ni lang genog ween.
    So bi Klock dree rüm, fangt denn de Nomeddag an un de Obend geiht denn bi Klock süss rüm los. De is overs ni vörbi, wenn dat düster ward. Bi uns geiht de Obend länger. Bet Klock ölben oder so.
    Twüschendör, so bi söben rüm, löppt in’t Fernsehn dat „Vörobendprogramm“. Wat is so’n Vörobend denn överhaupt?
    Ick weet dat ni.
    No ölben kümmt Nacht, Meddernacht un Geisterstünn un denn kümmt so’n Grauzone. Mennige seggt dor Nacht to un annere seggt, dat se bet „morns“ Klock dree noch fiert hebbt. Hä? Ick verstoh langsom gor nix mehr. Mit Morn, Vörmeddag, Meddag, Meddagstünn, Nomeddag, Vörobend, Obend, Nacht, Meddernacht, Geisterstünn un Grauzone, hebbt wi ganze ölben Tieden an Dag. Un bi de mehrsten dorvun, weet man ni so recht, wann se anfangt un wann se weller ophölt.
    Ick mutt ook ni jeden Afsnitt vun Dag ’n Noom geeven. Un an un för sick steiht man dor as Plattdüütschen un överhaupt as Norddüütschen je ook över, denn wi seggt jümmers „Moin“, annerlei, wat dat hell oder düster is.
    Jo, dor kann ick wat mit anfangen…
    In düssen Sinn