Annerletzt
seet ick an Disch un för mi leeg ’n ganzen Schwung Krom. Ick tell mol op: Een
dörsichtigen Büddel, so 25 mol 35 Zentimeter groot, een Stück dörsichtiged,
stieved Plastik, dat utseh, as de Flünken vun ’n Wüps un noch ’n längered Stück
ut datsülbige Materiol, dat to’n Kring opdreiht weer. Denn ’n Stück Papp, jüst
so opdreiht, noch ’n Pappstück, 35 mol 20 Zentimeter groot, twee dörsichtige
Plastikklammern un veer blanke Klammern ut Metall. Nu noch twee Stück Poppier,
so ganz dünned Seidenpoppier, tosom ’n halven Quadrotmeter groot. Denn weern
dor noch twee dicke Pappstücken, as Visitenkoarten seh’n de ut, een mit’n dicke
Kordel, dat annere mit ’n dünned Plastikband doran. Dat weer’t. Un nu dörft Ju
mol roden, worüm de ganze Krom vör mi op’n Disch leeg. Na, hebbt Ju ’n Idee?
Nä? Na denn pass op:

Ick heff
jüst mien niedet Hemd utpackt. Dat Hemd treck ick an, overs all den annern
Krom, de op’n Disch leeg, heff ick wechsmeeten. Bi’t Wechsmieten heff ick mi
würkli schomt vun wegen Natuurschutz un so. Overs wat schall ick moken – nokelt
mach ick je ook ni to mien Termine loopen.

Nu heff
ick mi overs frogt, worüm dat Hemd so dull inwickelt weer. Büxen, Jacken un
Kleeder för Fruunslüüd hangt in‘ Loden eenfach so op’n Bügel. Worüm dat ni ook mit
Hemm’ geiht, dat verstoh ick ni. Dösig ne. 

Un denn
mitmol heff ick an’t EU-Parlament dinken musst oder an‘ Bunnesdag. Dor löppt je
ook veele Mannslüüd mit Hemm‘ rüm un vun de Dorsten jett wohrschienli jedeneen
teihn oder mehr Hemm‘ in’t Schapp.

Nu stellt
sick mol den Barg Müll vör, de allent ehr Hemm‘ afsmeeten hebbt. Snacken doht
se overs doröver, dat „Plastikbüddels“ un „Kunststoffbekers“ verboden warrn
schüllt. Dor staunt de Fachmann un de Laie wunnert sick. Steekt de an Enn
veellicht mit de Verpackungsindustrie ünner de Deek, de mit allns, wat se
annerwegens ni mehr afsetten kann, nu Hemm‘ inwickelt? Na jo, veellicht is dat
je eenfach blots so, dat man ni süht, wat an Müll achter een op de Streck‘
blifft, wenn man as „goodet Bispeel“ vörangeiht…

In
düssen Sinn

Fröher
heff ick je dacht, Corona is ’n Zigarrnmarke oder ’n Beer ut Mexiko. Intwüschen
heff ick overs dortolehrt.

As dat mit
den Virus in China losgung un glieks vun Pandemie un sowat snackt wurr, dor
heff ick mi würkli so’n lütt beten Sorgen mokt.

Denn
keem overs all de Experten togang un de Mehrsten vun de hebbt seggt, wat dat
allns gor ni so wild is un dat veel mehr Lüüd an Grippe dootblifft.

Na jo.
Mi is dat je annerlei woan ick dootbliff, doot is man achteran so oder so.

Veellicht,
heff ick mi överleggt, hett dor je ook blots ’n Pharma-Konzern Lunte rooken un is
anfungen, mit Hochdruck ’n Middel gegen dat Virus tosomtokleihn. Un dormit se de
Medizin denn ook düüer ünnert Volk bringen kunnen, hebbt se ehr eegen‘ Experten
vör de Kameras stellt, üm de Lüüd bang to moken.

Nu kruupt
dat dorste Corona-Schiet je overs ook al bi uns rüm. In Italien geiht keeneen
mehr vör de Döör, as man heuert, in NRW fangt se ook al an de Kinnergoorns un
Schooln dichttomoken un so wieder.

Un ick?
Jo, ick weet ook ni mehr, wat ick noch glööven schall. Mann schall anner Lüüd
ni mehr de Hand geeven, sick sülms ni mehr in de Snut foten un küssen schall
man ook ni. Och, mi will so un so keeneen mehr küssen. Dor bün ick al mol op de
seekere Sied. Un doch mok ick mi Gedanken. In de Norichen seggt se mol dat un
mol düt, so no dat Motto: „Bliev ganz ruhi sitten un loop gau wech! Is gor nix
los, overs slimm is dat…“

Wat
schall man dorvun holn. Normolerwies, wenn lüüd sick so wellerspreeken doht, is
dat ’n ganz seekered Teeken dorför, dat se Politikers sünd – oder keen Ohnung
hebbt, wat würkli los is – oder beides op mol.“

Schall
ick nu jedeneen frogen, wat he jüst ut China, Italien oder NRW kümmt? Ach wat,
ick mok eenfach so wieder as jümmers un pass ’n beten op. Man kann je ook jeden
Dag vör’n Bus loopen, wenn man ni vörsichti is. Ach nä, düsse Week je ni, de
Busfohrers weern je in Streik. Overs näste Week is dat ook weller vörbi.

Tscha. Ick segg
denn eenfach mol, goode Gesundheit, ne… 

In
düssen Sinn

Dat
gifft je Sooken, de Mannslüüd doht un de Fruunslüüd ni verstohn künnt, jüst so,
as dat Sooken bi Fruun gifft, de man as Mann ni begriepen kann. Dat is genau de
Beriek, de Gletschersplate, an de de Gliekmokerie mang de Geschlechter dat
„Gender Mainstreaming“, as dat op Düütsch heet, sien Grenzen hett.

Un een
vun düsse Grenzen deiht sick op Tant‘ Meier op. Ni to Huus. Dor gebruukt man de
Boodstuuv je tomeist Geschlechterövergriepend. In Dörpskrog oder in Restaurant
to’n Bispeel, also in öffentlichen Ruum, is dat ganz anners.

Dor sünd
de Tant‘ Meiers för Fruuns- un Mannslüüd trennt. Un achter de Döörn vun de
Tant‘ Meiers för Fruunslüüd, fangt för mi as Kirl dat groote Geheemnis an.

Wenn
Mannslüüd nömli in Krog oder so op Tant‘ Meier goht, denn goht se dor ganz
alleent hen, mokt ehr Geschäft un kümmt weller trüch. Ferti. Bi Fruunslüüd is
dat anners.

De goht jümmers to tweet oder to drütt op ehr Tant‘ Meier. Ganz opgereegt sünd se, wenn se
dor hengoht. Un wenn se denn no’n Tied mang dree un 20 Minuten wellerkümmt,
denn sünd se an Gluttern as de Heuner op de Stang‘ un freut sick, as wenn se
jüst vun’n Weltreis trüchkeem‘.

Dat heff
ick al vör meist 40 Johr in de School beobacht‘.

Wat ist
dor los, op de Fruuns-Toletten? Is dor ’n Kino mit inbuut oder ’n Theoter?
Steiht dor jümmers ’n Komiker parot, de ehr so dull to’n Lachen bringt?

Un wenn
man as Mann ’n Fruu frogt, wat se mit de annern Deerns dor op Schiethuus
veranstalt‘, denn is de Antwoord: „Och, nix…“

Ick
glööv dat ni, denn to Huus „striedt“ se sick mit ehr Mannslüüd över „nix“. Is
dat veellicht ’n anner’d Nix? Nix is doch jümmers nix. Un nix is ni besünners
veel, wat ick weet.

Overs
tööv, ick krieg dat rut. Bald besorg ick mi ’n Överlevensutrüstung as Rambo un
’n Helm mit ’n Lamp boben an. Veellicht ook ’n Gasmaske – man kann je ni
weeten. Dormit goh ick denn bi de Fruunslüüd op Tant‘ Meier. Un wenn ick
rutfunnen heff, wat dor löppt, denn lot ick Jüm dat an düsse Steed weeten…

In
düssen Sinn

So, nu
is dat amtli. Ut Annegret Kramp-Karrenbuuer ward keen AKKanzler mehr. Dat weer
je ook keen eenfachen Posten, den se as CDU-Chefin övernohm hett.

Un dat
Frie’ch Merz, Armin Laschet oder Jens Spahn dat beter mokt, is lang noch ni rut.

Op’t
letzt‘ weer dat je de Landdagswohl in Thüringen un wat dor so anhung, de AKK
dorto bröcht hett ehr’n Hoot to nehm.

Dorbi
gifft dat dor je an un för sick keen Partei, de sick un de Demokratie dor ni
blameert hett. De CDU hett dor twor de mehrsten Stimm‘ overs glieks dorachter
kümmt de Linken un de Rechten. Un mit de will man sick as CDU ni afgeeven,
annerlei wat dat Volk wählt hett.

Demokratie
heet bi uns anschien’d, dat dat veer oder beter geseggt fief Partei’n gifft, de
in Bund regeern dörft. De Greunen, de FDP un natüürli de SPD, de CDU un de CSU.
Dat blangbi de CDU un de CSU bi Bunnesdags-Wohln as een‘ Partei optreden doht,
üm möglichst veele Stimmen aftogriepen, ansünsten overs jümmers ehr eegen Supp
an kooken sünd, dat heff ick vör 30 Johr jüst so weni verstohn as hüüt. Liekers
nööm ick düsse veer, fief Partei’n mol de „Gooden“.

De
annern Partei’n kann man twor wähln, overs se dörft ni mitregeern, weil de
Gooden dat ni toloten doht.

Bi de
Rechten kann man dat verstohn, dor hebbt wi keen goode Erfohrung‘ mit mokt. Un
de Linken hebbt je den Sozialismus in ehr Parteiprogramm stohn. Un vun
Sozialismus wüllt de Gooden nix weeten. Ick wunner mi blots, dat de Gooden
överhaupt keen Kummer mit den chinesischen Kommunismus hebbt. Mit de
kommunistischen Chinesen lött sick je so fein Geschäfte moken.

Liekers:
Wat dat Volk wählt hett, dat mutt man as CDU-Chef eenfach mol locker
wechignoreern. Dat – un veele annere Sooken, de een dösig vörkom‘ künnt, mutt
man dor utholn un eenfach wiederhen seggen, dat man politisch inne Meern steiht.
Dat is ni no jeden sien Gesmack.

Overs
lot man, AKK, in so’n verdreihted Versteekspeel, much ick ook keen Kanzler
ween…

In
düssen Sinn

Wat weer
dor vörigen Dünnersdag un Friedag los? Dat gung so fix, dat ick dat meist ni
mitkreegen heff un intwüschen snackt dor al keeneen mehr vun. So kann dat ni
blieven!

Also:
Los gung dat mit Alexander Gauland, den se de politische Immunität wechnohm
hebbt. He schall, bi de Stüüer 6000 Euro an Fiskus vörbischummelt hebben.  Süssdusend! Ick much ni weeten, wo veel Geld
sien Kollegen vun de CDU, de SPD, de Greun‘ un so wieder al an’t Finanzamt
vörbimogelt hebbt.

Nu bin
ick wiss keen Fründ vun Gauland un mit de AfD heff ick ook nix an Hoot. Overs
mootig finn ick dat je vun de annern Afgeordneten, för de Opheevung vun Gauland
sien Immunität to stimmen. Mi wurr blots mol interesseern, wo veel vun de
Afgeordneten sick vör de Afstimmung noch gau ehr Konto-Utzüge trocken un sick
den Sweet vun de Stirn wischt hebbt. Dorno keem glieks de näste Afstimmung in
Sooken Immunität. Dütmol bi Karin Strenz vun de CDU. Ehr hebbt se de Immunität wegen
Besteekung wechnohm. Aha.

22000
Euro schall se vun Lobbyisten ut Aserbaidschan annohm hebben. Achteran is se
ook noch dör „pro-aserbaidschanisches Verhalten“ opfulln, hebbt se seggt.

Dorvun,
dat Politikers sick besteeken lött, heff ick je noch nie wat heuert. Mutt
anschiend dat erste Mol ween hebben. Ick freu mi, dat dor glieks ’n Riegel
vörschoven ward.

Grund sick to freu’n harr ook Mario Draghi, de ole EZB-Chef. De hett dat Bunnesverdeenstkrüüz
dorför kreegen, dat he dat Geld vun de Sporers in de Taschen vun de Banken un
Konzerne schüffelt hett. Schier.

In Reichsdag
sitt overs een, de all düsse Gaulands, Strenz‘ un Draghis överkann: Wolfgang
Schäuble. De hett nömli al 1994 vun den Waffenhöker Karlheinz Schreiber 100000
Mark insackt. Dat Geld is – simsalabim – verschwunnen un nix dorvun is op’t Finanzamt
ankomen.

Dormit
hett Schäuble sick bet hüüt to’n Finanzminister un to’n Bunnesdagspräsident
qualifizeert. Un wat dat Bunnesverdeenstkrüüz angeiht – dorvun hett Wolfgang al
twee Stück. De hett keen Immunität – de hett ’n Teflon-Beschichtung…  

In
düssen Sinn