Tscha,
in Oogenblick hebbt wi – also de Mehrsten vun uns – je ’n Barg Tied, ne. To
Anfang is dat je gor ni so slecht. Man kann mit de Kinner speeln, wenn man wülk
in’t Huus hett, den Goorn kann schier moken, wenn een dor is un de Bood‘ kann
man ganz kommodig oprüüm un saubermoken. Mit de Tied hett man dat overs allns
dör un in’t Fernsehn kümmt blots slimme Norichen, dor mach man ook nix mehr vun
heuern.

Wat kann
man also moken, wenn een eenfach nix mehr infallt un een langwieli ward?

Dor heff
ick mi mol Gedanken över mokt. Ick heff ook sülms utprobeert, wat mi so infulln
is. To’n Bispeel dat hier: Mi hett jümmers al mol interesseert, wo veel
Boorsten an so’n Tähnböss an sünd. Dor stoht je jümmers so lütte Bünnels vun de
dorsten Plastik-Hoor tosom. Bi mien Tähnböss sünd dat 21 Bünnel un een Bünnel
hett 19 Boorsten. Dat mokt 399 Stück. 209 dorvun sünd witt, de annern blau. Aha.

So, de
ersten fief Minuten sünd rüm. Nu stoht dor je noch mehr Tähnbössen. De vun mien
Madam hett mehr Boorsten as mien, 420 nömli. De vun de Kinner, dat sünd
elektrische – also de Tähnbössen, ni de Kinner –, de hebbt veel weniger. Kiek: Twindig
Minuten sünd rüm. Wat nu? Schull ick mol kieken, wo so’n Fernsehapparot vun
binn‘ utsüht? Och nä, leever ni. Dat gifft blots Arger. Veellicht kunn ick je
mol ’n Rull Tolettenpoppier nehm, all de Zeddels, de doran sünd, afrieten, ehr
stärken un plätten un in’t Schapp leggen. Dat Tüch is je richti begehrt worrn
in de letzte Tied. Pass man op, Schiethuuspoppier löst den Euro noch as Währung
af.

Na jo,
all sowat kann man in Momang moken. Dat is twor ni besünners sinnhafti, overs
dorför dat allns Sinn mokt, wat he deiht, is de Minsch je noch nie bekannt
ween.

Veellicht
is dat je ganz good, dat mol allns ’n Tied lang still steiht. Stiegt man mol
ut‘ Hamsterrad ut – hamstern künnt wi je al – denn kann een Menniged klor warrn
un man kann wat verännern.

Dat is
also ni blots ’n Krise, dat is ook ’n Schangs. Mol kieken, wat wi all tosom ut
düsse Schangs mokt…